Usain Bolt, ni mwanariadha wa mbio fupi ambaye ni mzaliwa wa Jamaica. Mwanariadha huyu si tu anatajwa kama mwanariadha mwenye kasi kuliko wote, bali pia anatajwa kama mwanadamu ambaye anauwezo wa kufukuza upepo kuliko wanadamu wote duniani.
Kwa upande mwingine, mwanasoka Cristiano Ronaldo anayekipiga katika klabu ya Real Madrid ambaye pia ni mshindi wa Tuzo za Ballon D’or mara tatu, mara ya mwisho akichukua mwaka 2014 ndiye mwanasoka anayesifika kwa kutokuwa rafiki mzuri na magolikipa. Chenga za maudhi, misuli mikubwa, uwezo wa kukabiliana na mabeki na mashuti ya nguvu yanayowewesesha magolikipa ndizo sifa za kipekee za mchezaji huyu mahiri duniani.
Mwezi Mei, Chama cha Mapinduzi (CCM) kilipuliza filimbi ya kuashiria kuruhusu makada wa chama hicho kutangaza nia ya kugombea urais wa Jamuhuri ya Muungano ya Tanzania. Msururu wa makada wa chama hicho ulijitokeza na unaendelea kujitokeza kutangaza nia na kuchukua fomu kwaajili ya kuchaguliwa na chama hicho na kupeperusha bendera yake.
Hadi sasa, zaidi ya makada 30 wakubwa na wakongwe ndani ya chama hicho wametangaza nia na kuchukua fomu za Urais. Kila mmoja kati ya makada hawa amejigamba kuwa atabadilisha uchumi wa nchi na watu wake, na katika utawala wake tutashuhudia mabadiliko makubwa ya kiuchumi, kijamii na kisiasa. Idadi hii ya watangaza nia ni kubwa kulinganisha na majina matano yatakayopelekwa katika kamati kuu na hatimaye halmashauri kuu ya taifa ya chama ambao utaamua mgombea ambaye
Baadhi ya makada wanaotajwa sana kuwa wanaweza kupewa nafasi ya kupeperusha bendera ya chama hicho ni Edward Lowassa, Mizengo Pinda, John Pombe Magufuli, Jaji Augustino Ramadhani, Charles Makongoro Nyerere, Friedrick Sumaye, January Makamba, Bernad Membe Dr. Harrison Mwakyembe, Gharib Billal na Profesa Sospeter Muhongo.
Swali ambalo hadi sasa wengi watakuwa wanajiuliza ni kuwa ni nani Usain Bolt atakayevuka viunzi na kukata utepe wa kuashiria ushindi katika mbio hizi za Urais? Na katika hiyo “first eleven” ya mbio za urais, ni nani atakayekuwa Cristiano Ronaldo, mwenye misuli mikubwa ya kuwapangua wenzake, apige chenga za maudhi kuonesha uhodari wake na hatimaye kufunga goli litakaloamua kupitishwa kwake?
Tusubirie hapo July 13 ambapo kamati kuu itamaliza vikao vyake na kupitisha majina matano ya watangaza nia ambao watapelekwa Halmashauri Kuu ya Chama Taifa kwa ajili ya kujadili majina hayo na kuyapigia kura ili kumpitisha mgombea wa urais kupitia chama hicho.
0 comments:
Post a Comment