Brazil imepata ushindi wake wa kwanza kwenye mashindano ya Copa America bila ya nyota wake Neymar ambaye usiku wa jana alikuwan jukwaani kama mshangiliaji wakati timu yake inakipiga dhidi ya Venezuela kwenye mchezo wa mwisho wa kundi C ambapo Brazil ilishinda kwa goli 2-1 na kujihakikishia kutinga kwenye hatua ya robo fainali ya michuano hiyo.
Ilibidi Neymar awe jukwaani kuishangilia timu yake kufuatia kulimwa kadi nyekundu na kufungiwa kucheza mechi nne pamoja na faini ya dola 10,000 za kimarekani baada ya kuonesha utovu wa nidhamu kwa kumpiga na mpira mchezaji wa Colombia na kumtolea mwamuzi maneno makali.
Thiago Silva aliyenyang’anywa unahodha wa Brazil alianza kuifungia Brazil goli la kwanza zikiwa zimepita dakika tisa tu tangu kuanza kwa mchezo, lakini dakika ya 51 Roberto Firmino akaihakikishia Brazil kufuzu kucheza hatua ya robo fainali baada ya kuifungia timu yake goli la pili akimalizia kazi safi iliyofanywa na Wllian.
Goli la kufutia machozi la Venezuela lilifungwa na Miku dakika ya 84 ya mchezolakini lilikua halina msaada kwa timu yake ambayo imemaliza mkiani kwenye kundi C ikiwa na ponti tatu.
Brazil itakutana na Paraguay kwenye mchezo wake wa robo fainali utakaopigwa siku ya Jumamosi mchezo ambao unatarajiwa kuwa na upinzani mkali na wenyekuvutia.
Mchezo mwingine wa kundi C uliopigwa jana usiku ulikuwa kati ya Colombia dhidi ya Peru, mchezo huo ulimalizika kwa timu hizo kwenda sare ya bila kufungana ambapo Falcao bado ameonekana kushindwa kurejesha makali yake ya kupasia nyavu.
