MABAO MATATU KWA MPIGO YA KIIZA NI ‘MAJIBU MENGINE MABAYA’ YANGA SC

Mshambuliaji wa Simba SC akishangilia moja ya goli lake alilofunga kwenye mchezo kati ya Simba dhidi ya Kagera Sugar

Na Baraka Mbolembole

Mfungaji bora wa ligi kuu ya Uganda, Hamis Kiiza amejitofautisha msimu katika ufungaji. Akiwa na klabu yake mpya, Simba SC, Mganda huyo tayari amefunga magoli matano kati ya sita ya timu yake katika michezo mitatu ya ligi kuu Tanzania bara msimu huu.

MAGOLI MA3 YA KICHWA

Kiiza, 25 aliisaidia Simba kushinda kwa mara ya kwanza ndani ya miaka mitatu katika uwanja wa Mkwakwani, Tanga. Alikuwa mchezaji wa kwanza wa Simba kufunga katika michezo 7 ambayo Simba ilizikabili Coastal Union, JKT Mgambo na African Sport katika nyakati tofauti ndani ya miezi 36. Alifunga dakika ya 67′ akiunganisha kwa kichwa krosi ya mshambuliaji mwenzake, Musa Hassan Mgosi wakati Simba iliposhinda 1-0 dhidi ya African Sports, Septemba 12.

PASI YA IBRAHIM AJIB

Wakati Simba ikiongoza 1-0 na mechi ikiwa 50/50, kocha wa Simba, Muingereza, Dylan Kerr alimuinua Kiiza katika benchi kuchukua nafasi ya kiungo-mshambulizi, Mwinyi Kazimoto, Mganda huyo hakuchua dakika nyingi sana kufunga na kuifanya timu yake kuwa mbele kwa magoli 2-0 dhidi ya JKT Mgambo, Septemba 16 katika uwanja huohuo wa Mkwakwani, Tanga na kuisaidia timu yake kushinda mechi ya pili mfululizo. Goli hili alifunga dakika ya 73′ kwa mguu wa kushoto akimalizia pasi ya mshambulizi mwenzake kijana Ibrahim Ajib.

DAKIKA YA 30′, 46′, 9O’, ‘ HAT-TRICK’ YA KWANZA SIMBA, ‘ HAT-TRICK’ YA KWANZA VPL

Simba iliwapumzisha kabisa wachezaji wake, nahodha, Mgosi na mlinzi wa kati, Mganda, Juuko Murishid katika mchezo wao wa tatu dhidi ya Kagera Sugar jana Jumapili, mlinzi wa kulia, Hassan Kessy na kiungo-mshambulizi, Kazimoto walianzia katika benchi lakini bado ushindi wa asilimia 100 uliendelezwa na Kiiza ambaye alifunga magoli matatu kwa mpigo ‘hat-trick’ kwa mara ya kwanza akiwa mchezaji wa Simba msimu huu.

Mabao hayo matatu kwa mpigo ni ‘majibu mengine mabaya’ upande wa mahasimu wao Yanga SC ambao walimtema takribani miezi 18 iliyopita ili tu asajiliwe mshambulizi ‘aliyechemsha’ Mbrazili, Geilson Santos ‘Jaja’. Alifunga kwa kichwa dakika ya 30′ akimalizia krosi ya mlinzi wa kushoto, Mohamed Hussein, akafunga tena kwa kichwa dakika ya 46′ akiunganisha krosi-pasi ya kiungo, Awadh Juma.

Magoli yote hayo mawili alifunga akiwa ‘huru’  bila uwepo wa walinzi wa Kagera Sugar. Goli lake la tatu alifunga dakika ya 90′ kwa mguu wa kulia akimalizia pasi ya kiungo, Kazimoto. Nani anafuata baada ya mshambulizi huyo kufunga ‘hat-trick’ yake ya kwanza katika ligi kuu bara?. Hakuwahi kufanya hivyo akiwa Yanga.

05:40:00