TIP TOP CONNECTIONS YAKABIDHI VIFAA VYA MICHEZO KWA WASHIRIKI WA MAGULI CUP, KIVUMBI KUANZA KUTIMKA KESHO

Katibu wa mashindano DRFA Daudi Kanuti (kushoto) akimkabidhi jezi mwakilishi wa timu ya Faru Jeuri

Katibu wa mashindano wa DRFA Daudi Kanuti (kushoto) akimkabidhi jezi mwakilishi wa timu ya Faru Jeuri

Kundi la muziki wa kizazi kipya la Tip Top Connectons lenye maskani yake Manzese jijini Dar es Salaam, leo limekabidhi vifaa vya michezo kwa timu shiriki za michuano ya Magufuli Cup #Hapa Kazi Tu, mashindano yanayotarajiwa kuzinduliwa rasmi Ijumaa (kesho) kwa mchezo kati ya Abajalo SC dhidi ya Zakhem SC kwenye uwanja wa Mwl. Nyerere Makurumla.

Vifaa vilikabidhiwa kwa timu hizo ni pamoja na jezi, mipira na vifaa vingine kwa ajili ya wachezaji na waamuzi ambao watakuwa wanachezesha mashindano hayo.

Baadhi ya vifaa ambavyo vimekabidhiwa kwa timu shiriki za michuano ya Magufuli Cup

Michuano hiyo ambayo itashirikisha jumla ya timu nane itaanza kutimua vumbi rasmi kesho na Mgombea Ubunge jimbo la Kinondoni kupitia tiketi ya Chama cha Mapinduzi (CCM) Idd Azan anatarajiwa kufungua mashindano hayo.

Akikabidhi vifaa hivyo kwa timu shiriki za mashindano hayo katibu wa mashindano wa Chama cha Mpira wa Miguu mkoa wa Daes Salaam (DRFA) Daudi Kanuti amesema anatarajia kuona mashindano hayo yakifanyika kwa amani na utulivu kama malengo yalivyokusudiwa.

Mwakilishi wa timu ya Friends Rangers akionesha jezi itakayotumiwa na timu yake kwenye michuano ya Magufuli Cup

“Naamini timu zote zitacheza mpira na tutapata bingwa wa mashindano haya kwa uwezo na si vinginevyo. Kikubwa katika michuano hii ni kujenga ushirikiano na umoja miongoni mwa vijana na kutunza amani hasa katika kipindi hiki tunapoelekea kwenye uchaguzi mkuu”, amesema Kanuti.

Mashindano hayo yameandaliwa kwa lengo la kuwakutanisha vijana ambao wanacheza soka hususan soka la mchangani na kuwapa fursa ya kuonekana na kuonesha vipaji vyao pamoja na mashabiki wa soka kushuhudia burudani na vipaji toka kwa wachezaji mbalimbali lakini pia kulinda amani katika kipindi hiki kuelekea uchaguzi mkuu.

Daudi Kanuti (kushoto) akimkabidhi jezi mwakilishi wa timu ya Burudani FC

Magufuli Cup ni michuano ambayo itashirikisha timu nane toka vitongoji mbalimbali vya jiji la Dar es Salaam. Timu hizo ni Abajalo SC, Tuamoyo, Goms United, Friends Rangers, Zakhem SC, FC Kauzu, Burudani SC, pamoja na Faru Jeuri.