OFM yanasa bangi ikilimwa kando ya kituo cha biashara!

Viongozi wa Serikali wakiing’oa bangi hiyo.

Waandishi wetu

Kweli hii ni kali! Kile kikosi kazi cha Oparesheni Fichua Maovu (OFM) kinachomilikiwa na Global Publishers, kimenasa tukio la aina yake la kilimo cha mmea haramu wa bangi kandokando ya kituo cha daladala na kuibua mshtuko mkubwa.

Bangi hiyo ikiwa imestawi vilivyo.

NI SINZA AFRIKA SANA, DAR

Tukio hilo lililotafsiriwa kuwa ni kumchokoza Rais John Pombe Magufuli ambaye ametangaza vita dhidi ya matumizi na biashara ya madawa ya kulevya lilinaswa hivi karibuni katika eneo la Afrika Sana jijini Dar, mbele ya soko jirani kabisa na Kituo cha Daladala cha Afrika Sana kwenye Barabara ya Shekilango.

Eneo ilipopandwa bangi hiyo, Afrika Sana jijini Dar.

OFM YATIMIZA MAJUKUMU YAKE

Ikiwa kazini kutimiza majukumu yake majira ya mchana, OFM iliona kijani kibichi kilichostawi vizuri eneo hilo lenye mtaro mkubwa wa maji taka ndipo machale yakawacheza makachero wake na kuamua kuuchunguza mmea huo.

Wakati wakiangazaangaza, OFM walishuhudia mimea miwili mikubwa ambayo iko tayari kuvunwa iliyokuwa imestawi vilivyo ikionekana kupata matunzo ya kutosha ikiwa ni pamoja na kumwagiliwa vizuri.

Katika kuuchunguza mmea huo, ndipo wakatokea vijana ‘wataalam wa mambo hayo’ ambao walithibitisha kuwa mmea huo ni bangi.

Hata hivyo, walipobanwa juu ya mmiliki wa shamba hilo la bangi wakati ni kinyume na sheria, vijana hao walikana kumjua mhusika hivyo kutoa nafasi kwa OFM kuripoti tukio hilo katika Kituo cha Polisi cha Kijitonyama almaarufu Mabatini jijini Dar.

YAVUNWA USIKU

Baada ya kuripoti kituoni, askari aliyekuwa zamu alichukua maelezo na kuahidi kulishughulikia suala hilo mara moja.

“Kwa maeneo hayo mnayoelekeza sisi tunayajua vizuri sana. Tunalishughulikia mara moja msijali,” alisema polisi mmoja aliyekuwa zamu.

Katika kufuatilia, siku iliyofuata, OFM ilifika eneo la tukio na kukuta bangi hiyo hasa ile mimea mikubwa iliyostawi na kuwa tayari kuvunwa ilikuwa imeng’olewa usiku wake na kwamba haikujulikana ni nani aliyeiondoa.

SERIKALI YAVAMIA

Pamoja na kuvunwa huko lakini kwa kuwa shamba hilo lilisheheni mimea hiyo bado mzigo ulikuwa umebaki wa kutosha hivyo OFM ikafikia hatua ya kwenda kuripoti tukio hilo Ofisi za Serikali za Mitaa Kata ya Kijitonyama jijini Dar.

Baadhi ya viongozi waliokutwa kwenye ofisi hizo walitoa ushirikiano wa kutosha ambapo waliambatana na OFM kisha kwenda kulisafisha eneo hilo kwa kuing’oa mimea hiyo ya bangi na kuchukua uthibitisho na kwenda nao kwenye ofisi zao huku wakiahidi kuripoti polisi na kuwakamata wahusika ili sheria ichukue mkondo wake.

Imeandikwa na Chande Abdallah, Issa Mnally na Mayasa Mariwata.